اپریل:براہ راست بیرونی سرمایہ کاری 172 فیصد بڑھ گئی
اسٹیٹ بینک کے مطابق پاکستان میں براہ راست غیر ملکی سرمایہ کاری اپریل 2024 میں 13 کروڑ 19 لاکھ ڈالر بڑھ کر 35 کروڑ 88 لاکھ ڈالر ہوگئی، جو 172 فیصد اضافہ ہے ۔براہ راست غیر ملکی سرمایہ کاری، خصوصی سرمایہ کاری سہولت کونسل (ایس آئی ایف سی)کے مینڈیٹ میں شامل ہے ، ایس آئی ایف سی کے قیام کا بنیادی مقصد ایف ڈی آئی میں اضافہ کرنا ہے ۔مرکزی بینک کے مطابق گزشتہ 51 ماہ میں یہ سب سے بڑی براہ راست غیر ملکی سرمایہ کاری ہے ، ماہانہ بنیادوں پر کیے گئے موازنے کی بنیاد پر ایف ڈی آئی میں 39 فیصد اضافہ ہواہے ۔ غیر ملکی سرمایہ کاری مارچ 2024 میں 25 کروڑ 80 لاکھ ڈالر تک پہنچ گئی تھی جبکہ رواں مالی سال کے ابتدائی 10 ماہ (جولائی تا اپریل)کے دوران ایف ڈی آئی1.46 ارب ڈالر ہو گئی۔ جو مالی سال 2023کی اسی مدت کے دوران ایک ارب 35 کروڑ ڈالر ریکارڈ کی گئی تھی۔چین 17 کروڑ 73 لاکھ ڈالر کی براہ راست غیر ملکی سرمایہ کاری کے ساتھ سرفہرست رہا، جبکہ متحدہ عرب امارات اور کینیڈا بالترتیب 5 کروڑ 19 لاکھ ڈالر اور 5 کروڑ 18 لاکھ ڈالر کی سرمایہ کاری کے ساتھ دوسرے اور تیسرے نمبر پر رہے۔
